DFCC வங்கியானது இலங்கையில் பெண்களுக்கு உகந்த மிகச் சிறந்த பத்து பணியிடங்களில் ஒன்றாக அங்கீகரிக்கப்பட்டுள்ளது
November 30, 2021
இலங்கையிலுள்ள முதன்மையான வணிக வங்கிகளில் ஒன்றான DFCC வங்கி, அனைவருக்கும் சம வாய்ப்பளிக்கும் மற்றும் அனைவரையும் பங்குபற்றச் செய்யும் பணிச் சூழலை உருவாக்கும் முயற்சியின் மூலம், இலங்கையில் பெண்களுக்கு உகந்த மிகச் சிறந்த 10 பணியிடங்களில் ஒன்றாக அங்கீகரிக்கப்பட்டுள்ளது. CIMA Sri Lanka மற்றும் Satynmag.com ஆகியன ஒன்றிணைந்து முதன்முதலாக ஏற்பாடு செய்த Women Friendly Workplace Awards (WFWP Awards) 2021 விருதுகள் நிகழ்விலேயே இந்த அங்கீகாரம் கிடைக்கப்பெற்றுள்ளது.
பாலின சமத்துவம் மற்றும் பெண்களுக்கு உரிய அதிகாரமளித்தல் ஆகியவை DFCC வங்கியின் நிலைபேண்தகைமை மூலோபாயத்தின் ஒருங்கிணைந்த கூறுகளாக காணப்படுவதுடன், DFCC வங்கி எப்போதும் நியாயமான, வெளிப்படையான, சமத்துவமான மற்றும் அனைவருக்கும் சம வாய்ப்பளிக்கும் பணியிட நடைமுறைகளை உறுதி செய்வதற்கு மிகவும் முக்கியத்துவம் அளித்துள்ளது.
CIMA Sri Lanka மற்றும் Satynmag.com இணைந்து, பணியிடத்தில் பெண்களை ஊக்குவிக்கும் மற்றும் அவர்களுக்கு உரிய அதிகாரமளிக்கும் நிறுவனங்களை அங்கீகரிப்பதற்காக, Women Friendly Workplace Awards 2021 என்ற விருதுகள் நிகழ்வு அங்குரார்ப்பணம் செய்யப்பட்டுள்ளது. இந்த விருதுகள் நிகழ்ச்சியானது, இலங்கையில் பணியிடங்களில் பெண்களின் பங்கிற்கு அளிக்கப்படும் முக்கியத்துவத்தை வெளிப்படுத்துவதுடன், மேலும் நிலைபேண்தகைமை அபிவிருத்தி இலக்கு 05 – பாலின சமத்துவத்திற்கான தேசத்தின் அர்ப்பணிப்பை மேலும் வலியுறுத்துகிறது. இவ்விருதுகள் நிகழ்ச்சித்திட்டம் அனைத்து பாலினத்திற்கும் சம வாய்ப்பளிக்கும் பணியிடங்களை மேம்படுத்துவதற்கும் செழுமைப்படுத்துவதற்கும் ஒரு பாதையை ஏற்படுத்த முயல்வதுடன், பாலின வேறுபாடின்றி அனைத்து ஊழியர்களுக்கும் சமமான வாய்ப்பை வழங்குவதையும் உறுதி செய்கிறது. கணிசமான எண்ணிக்கையிலான வங்கிகள் மற்றும் வர்த்தக நிறுவனங்கள் விருது வழங்கும் நிகழ்ச்சித்திட்டத்தில் பங்கேற்றுள்ளதுடன், உள்ளூர் பணியாளர்களுக்குள் பெண்கள் சுபீட்சம் காண்பதை ஊக்குவிப்பதிலும், அவர்களை பணியில் தக்கவைத்துக்கொள்வதற்கு அனுசரணையளிப்பதிலும் தொழில் தருநர்களின் கவனம் அதிகரித்து வருவதையும் வலியுறுத்துகிறது.
முன்னணி வர்த்தகத்துறை ஆளுமையாளரான ரவி அபேசூரிய, CIMA UK தெற்காசிய சபையின் உறுப்பினரான மனோஹரி அபேசேகர, சுவசெரிய நிறுவனத்தின் பணிப்பாளர் சபைத் தலைவரான துமிந்திர ரத்நாயக்க, கொழும்பு பல்கலைக்கழக மனிதவளத் துறைத் தலைவரான பேராசிரியர் அரோஷ அதிகாரம், வட மாகாண ஆளுநரான ஜீவன் தியாகராஜா, CIMA இலங்கைக்கான முகாமையாளரான ஸஹாரா அன்சாரி மற்றும் Satynmag.com இன் ஸ்தாபகரும், ஆசிரியருமான நயோமினி ஆர் வீரசூரிய ஆகியோர் அடங்கிய மதிப்பிற்குரிய நடுவர் அணியால் விருதுகளுக்கான மதிப்பீட்டுப் பணிகள் மேற்கொள்ளப்பட்டன.
வங்கியின் சாதனை குறித்து DFCC வங்கியின் தலைமை நிர்வாக அதிகாரியான லக்ஷ்மன் சில்வா அவர்கள் கருத்துத் தெரிவிக்கையில், “DFCC வங்கி இலங்கையில் பெண்களுக்கு உகந்த மிகச் சிறந்த 10 பணியிடங்களில் ஒன்றாக சிறப்பிக்கப்பட்டுள்ளமை மிகுந்த கௌரவம் அளிக்கின்றது. DFCC வங்கி பணியாளர்கள் மத்தியில் பெண்களுக்கு உரிய அதிகாரம் அளிப்பதை மேம்படுத்துவதற்கான எங்கள் தொடர்ச்சியான, நிறுவன அளவிலான முயற்சிகள் இதற்குக் காரணமாக அமைந்துள்ளன. தொடர்புபட்ட அனைத்து தரப்பினருக்கும் சமூக மற்றும் பொருளாதார மதிப்பை தோற்றுவிப்பதன் மூலம் சமத்துவமான, எந்த சூழ்நிலையையும் தாங்கி, எழுச்சி பெறும் திறன் கொண்ட எதிர்காலத்தை நிலைநாட்டுவதற்கான எங்கள் பாதையில் தொடர்ந்து பயணிக்க DFCC வங்கியை இந்த பாராட்டு ஊக்குவிக்கிறது,” என்று குறிப்பிட்டார்.
DFCC வங்கி தொடர்பான விபரங்கள்
DFCC வங்கியானது 65 ஆண்டுகளுக்கும் மேலான பாரம்பரியத்துடன், வணிக மற்றும் அபிவிருத்தி வங்கி சேவைகளின் ஒட்டுமொத்த அம்சங்களையும் வழங்கும் இலங்கையின் முன்னணி, பாரிய நிதி நிறுவனங்களில் ஒன்றாகத் திகழ்ந்து வருகிறது. ஐக்கிய இராச்சியத்தின் பெருமதிப்பு மிக்க Global Brands Magazine சஞ்சிகையிடமிருந்து 2021 ஆம் ஆண்டுக்கான இலங்கையிலுள்ள Most Trusted Retail Banking Brand மற்றும் Best Customer Service Banking Brand ஆகிய விருதுகளை வங்கி வென்றுள்ளதுடன், இலங்கையில் Business Today இன்
தரப்படுத்தலின் பிரகாரம் முதல் 30 ஸ்தானங்களில் திகழும் வர்த்தக நிறுவனமாகவும் இடம் பிடித்துள்ளது. ICRA Lanka Limited இடமிருந்து [SL] AA- Stable என்ற தரமதிப்பீடும், Fitch Ratings Lanka Limited இடமிருந்து A+ (lka) Stable என்ற தரமதிப்பீடும் DFCC வங்கிக்கு கிடைக்கப்பெற்றுள்ளன.
கொழும்பு சினமன் கிரான்ட் ஹோட்டலில் இடம்பெற்ற விருதுகள் வழங்கும் வைபவம்.
படத்தில் காணப்படுகின்றவர்கள் (இடமிருந்து வலப்புறமாக) – சொனாலி ஜெயசிங்க, சிரேஷ்ட துணைத் தலைமை அதிகாரி, மனித வளங்கள், DFCC வங்கி பீஎல்சி; சாரா ட்விக், நிகழ்ச்சித்திட்ட முகாமையாளர், Women in Work Srilanka சர்வதேச நிதிக் கூட்டுத்தாபனம்; நயோமினி ஆர் வீரசூரிய, ஸ்தாபகர்/ஆசிரியர் Satynmag.com; ஸஹாரா அன்சாரி, இலங்கைக்கான முகாமையாளர், CIMA
